Enkuentro di Konseho Insular ku agensia di konsulta tokante kompanianan di gobièrnu

Durante e enkuentro aki, señora Aalse a presentá e resultadonan di un investigashon resien ku a wòrdu hasí tokante e kompanianan di gobièrnu na Boneiru.

Konseho Insular a inisiá e kombersashon aki pa haña mas komprondementu di e operashon i funshonamentu di e kompanianan di gobièrnu i nan ròl den e maneho públiko. Señora Aalse a duna un splikashon di e resultadonan di e investigashon, den kua el a enfoká, entre otro, riba e strukturanan di gobernashon, transparensia i e liñanan di responsabilisashon dentro di e organisashonnan aki.

Durante e reunion, a papia tambe kon e Konseho Insular por fortalesé su ròl komo supervisor pa ku e Kolegio Ehekutivo (BC)ora ta trata e kompanianan di gobièrnu. Den e kuadro aki, Konseho Insular a tuma e inisiativa pa pidi un splikashon mas profundo tokante e investigashon i a mustra interes den un posibel entrenamentu di “ Corporate Governance”. E entrenamentu aki lo mester kontribuí na un mihó komprondementu di e tareanan i responsabilidatnan di Konseho Insular relashoná ku e kompanianan di gobièrnu.

E Konseho Insular ta wak bèk riba un enkuentro balioso i ta gradisí señora Aalse i CRM Link pa nan boluntat pa kompartí konosementu i pa ofresé sosten den e proseso di profeshonalisashon di e supervishon di e entidatnan di gobièrnu.