Konseho Insular di Boneiru ta bishitá Sint Eustatius

E Konseho Insular di Boneiru a bishitá Sint Eustatius komo parti di nan strategia pa fortifiká e lasonan ku e isla rumannan. E importansia di enkuentronan personal ku koleganan pa deliberá tokante asuntunan krusial pa e tres islanan tabata sentral den e inisiativa akí.

Riba djárason 15 di novèmber a tuma lugá un enkuentro entre e miembronan di Konseho Insular di e islanan BES ku e meta pa prepará pa e revishon di e lei Wet op de Openbare Lichamen (Lei di Entidat Públikonan di) Boneiru, Sint Eustatius i Saba (WolBES) i e Financiële Verhoudingswet BES (FinBES) (Lei di Relashon Finansiero di BES).

E resultado di e reunion di dia 15 di novèmber ta enserá akuerdonan konkreto tokante e orario i e momentunan di preparashon pa revishon di e leinan.

E palabrashonnan akí ta inkluí, entre otro:

  1. Novèmber 2023: Reunion Preparatorio di Konseho Insularnan di BES, Sint Eustatius
  2. Desèmber 2023: Reunion Preparatorio di Konseho Insularnan di BES, Den Haag
  3. Yanüari 2024 (di dos òf di tres siman): Seshon plenario di e tres Konseho Insularnan na, Sint Eustatius
  4. Febrüari/mart 2024: Diálogo Polítiko di Alto Kalidat BES - Gobièrnu Nashonal, Den Haag

Un di e aspektonan importante di e deliberashon tabata trata e kreashon di un organisashon di kooperashon interinsular. E órgano di kooperashon akí lo ofresé e oportunidat pa kooperá strukturalmente riba otro áreanan den e negosiashonnan kontinuo ku Hulanda relashoná ku otro legislashonnan den futuro, pa di e forma ei por hasi uso mas efisientemente posibel di e rekursonan disponibel pa esaki.

Tambe a papia tokante e sosten nesesario di konseheronan eksperto. Kada un di e tres islanan a konsultá ku ekspertonan, i e Konseho Insularnan a akordá pa establesé un plataforma komun, manera ta menshoná den e Wet Gemeenschappelijke Regelingen (Lei di Regulashon Konhunto), kaminda e tres ekspertonan akí ta bini huntu. E reunion akí a marka un paso krusial den e esfuerso konhunto pa revisá profundamente e legislashon ku ta afektá e islanan BES. Ta di gran importansia pa tin preparashon stratégiko i un plan stratégiko pa garantisá logro di un resultado positivo.

E bishita akí no tabata enfoká solamente riba reunion formal, pero tambe riba fortifikashon di relashon personal i selebrashon di eventonan importante, manera Dia di Sint Eustatius. Dor di reuní durante e selebrashon akí, e miembronan di Konseho Insular di Boneiru a logra fortifiká e lasonan ku nan koleganan na Sint Eustatius i promové koperashon mutuo. E sorto di bishitanan i reunionnan akí ta hunga un ròl krusial pa garantisá kooperashon efektivo i deliberá na un manera konstruktivo tokante e interesnan di tur e islanan BES.