Miembronan di Konseho Insular a bishitá proyekto di bibienda inklusivo ku kuido na Hulanda

E proyekto MAESTRO ta un modelo di bibienda ku kuido inkluí, kaminda bibienda independiente ta kombiná ku espasio pa kuido intensivo. Den e kompleho aki lo tin 136 bibienda ku kuido i servisio nesesario, 250 apartamento pa hür i/of bende, espasio komersial, un garashi pa parker i un hardin komun, ku ta situá meimei di e edifisionan riba e garashi. Esaki ta un lugá kaminda no solamente abitantenan di e kompleho, sino tambe hende di e bario por pasa tempu den un ambiente agradabel.

E proyekto aki ta ilustrá un konsepto hopi avansá di biba: brinda grandinan e posibilidat pa bira grandi vital den un ambiente di biba regular. E kombinashon di biba independiente ku kuido intramural i  ekstramural ta forma un punto di salida esensial pa e desaroyo di barionan inklusivo den futuro.

Konseho Insular a bishitá e proyekto aki en konekshon ku e proyekto Nos Bario na Bonaire; un proyekto ku Stichting Cocari, ZW Groep i ministerie di VWS ta trahando riba dje: un bario inklusivo ku un sentro di kuido. E prinsipio pa desaroyá “Nos Bario” ta “bira grandi aktivo” i e bario ta pa tur hende. 

Pa e miembronan di Konseho Insular tabata un momentu balioso pa mira ku propio wowo kon e konsepto por tuma forma den praktiká. E konosementu nobo ku nan a haña lo sin duda yuda den e toma di desishon riba proposishonnan relashoná ku bario inklusivo i kuido integrá, ku keda presentá na Konseho Insular.